काकडेंनी भाजपला दिलेल्या सल्ल्यांचे शरद पवारांकडून कौतुक
पुणे:पुण्याचे भाजपचे सहयोगी खासदार संजय काकडे यांनी वेळोवेळी भाजपला दिलेल्या सल्ल्यांचे राष्ट्रवादीचे अध्यक्ष शरद पवार यांनी कौतुक केले आहे. काकडे यांनीच आज याचा गौप्यस्फोट केला.
एका कार्यक्रमात याबद्दल बोलताना काकडे म्हणाले की,शरद पवार यांना वाढदिवसाच्या शुभेच्छा द्यायला गेलो तेव्हा त्यांनीच गुगली टाकला. त्यावेळी काय संभाषण झाले, हे उघड करताना पवार आपल्याला म्हणाले की, संजय, हल्ली तू भाजपला चांगले सल्ले देतोस.
काकडे यांनी तीन राज्यात भाजपचा पराभव झाल्यावर भाजपने आता हनुमानाची जात, राम मंदिर यावर बोलण्यापेक्षा विकासाच्या मुद्यांवर बोलावे, असे जाहीरपणे सुनावले होते. जुमलेबाजी करून पुढील निवडणुका जिंकता येणार नाहीत, असेही मत त्यांनी व्यक्त केले होते. काकडे यांचे हे मत पवार यांनी टीव्हीवर पाहिले. काकडे जेव्हा पवार यांना शुभेच्छा देण्यासाठी गेले तेव्हा पवारांनीच काकडे यांच्या सल्ल्याचे कौतुक केले. आता भाजप काकडे यांचे सल्ले गांभिर्याने घेतो की दुर्लक्ष करतो, हे पहावे लागेल.
