मुंबई नगरी टीम
मुंबई : माजी मंत्री पंकजा मुंडे यांनी केलेल्या आवाहनाला साथ देत लाखो मुंडे प्रेमींनी घरात राहूनच लोकनेते गोपीनाथ मुंडे यांना सहाव्या पुण्यतिथी दिनानिमित्त अभिवादन केले. पंकजा मुंडे यांनी परिवारासह मुंबईतील निवासस्थानी तर खासदार प्रितम मुंडे यांनी गोपीनाथगडावर समाधीचे दर्शन घेतले.दरम्यान,कोरोनाच्या पार्श्वभूमीवर गर्दी टाळण्यासाठी गोपीनाथ गडावर पोलिसांचा तगडा बंदोबस्त तैनात करण्यात आला होता.
खासदार प्रितम मुंडे ह्या सकाळी गोपीनाथ गडावर पोहोचल्या. मुंडे यांच्या प्रतिमेचे पूजन करून त्यांनी समाधीचे दर्शन घेतले तसेच त्यांना आवडणा-या पदार्थाचा नैवेद्य दाखवला. पंकजा मुंडे यांनी आई प्रज्ञा मुंडे, ॲड. यशःश्री मुंडे, अमित पालवे, गौरव खाडे, आर्यमान पालवे, अगस्त्य खाडे आदी परिवारातील सदस्यांसह मुंडे यांच्या प्रतिमेचे पूजन केले व त्यांच्या आवडीचा पदार्थ करून दर्शन घेतले.अभिवादनाचे दोन्ही कार्यक्रम पंकजा मुंडे यांच्या फेसबुकवरून लाईव्ह करण्यात आल्यामुळे लाखो लोकांनी घरात राहूनच लोकनेत्याच्या दर्शनाचा लाभ घेतला.कोरोनाच्या पार्श्वभूमीवर जिल्हा प्रशासनाने विनंती केल्यामुळे पंकज मुंडे यांनी आपला परळीचा दौरा रद्द केला होता. कार्यकर्त्यांना घरात राहूनच पुण्यतिथी साजरी करावी,गडावर गर्दी करू नये असे आवाहन केले होते, त्यांच्या आवाहनाला लोकांनी मोठा प्रतिसाद दिला आणि गडावर न येता घरात राहूनच लोकनेत्यास अभिवादन केले. तरीही पोलिस प्रशासनाने खबरदारीचा उपाय म्हणून गडावर तगडा बंदोबस्त तैनात केला होता.
