राज्यातील शाळांमध्ये मराठी विषय सक्तीचा करा
अजित पवारांची सभागृहात मागणी
मुंबई : मराठी अभिमान गीताची कडवी ७ असतानाही फक्त ६ कडवी असलेले पत्रक वाटण्यात आल्याची बाब विधीमंडळ पक्षनेते अजित पवार यांनी सभागृहाच्या निदर्शनास आणून दिली.तर महाराष्ट्र दिनाच्या कार्यक्रमामध्ये अभिमान गीत सुरु असतानाच माईक बंद पडल्याची बाब लक्षात आणून देतानाच अजित पवार यांनी तीव्र नाराजी व्यक्त केली. हे कोणी मुद्दाम करत आहे का? हे कॉन्ट्रॅक्ट कोणाला दिले होते आणि त्यातून कोणाला काय मिळतंय याची चौकशी करा अशी मागणीही अजित पवार यांनी सभागृहात केली.
अजित पवार यांनी राज्यातील प्रत्येक शाळांमध्ये पहिली ते दहावीपर्यंत मराठी विषय सक्तीचा करा. कारण काही मुलांना मराठी नीट वाचता किंवा लिहिता येत नाही. मला कुणाचा अपमान करायचा नाही परंतु सभागृहातील काही सदस्यांनाही मराठी नीट येत नाही याबाबत नाराजी व्यक्त करतानाच मराठी भाषा टिकण्यासाठी हा निर्णय घेणे अत्यंत आवश्यक आहे.हा निर्णय घेतला तरच मराठी भाषा टिकेल असेही अजित पवार म्हणाले.मराठी भाषा विषयक ठरावावर बोलताना अजित पवार यांनी ही मागणी लावून धरली.दरम्यान मराठी भाषा विषयक ठराव मांडत असतानाच विनोद तावडे यांचे सभागृहामध्ये आगमन झाले त्यावर अजित पवार यांनी नाराजी व्यक्त केली.
