परिचारक आणि धनंजय मुंडे प्रकरणामुळे विधानसभेत गदारोळ
कामकाज दिवसभरासाठी तहकूब
मुंबई : विधानपरिषदेतील विरोधी पक्षनेते धनंजय मुंडे यांच्यावरील कथित आरोपावरून विधानसभेत आज प्रचंड गदारोळ झाला. भाजपच्या सदस्यांनी धनंजय मुंडे हाय हाय, खंडणी सम्राट हाय हाय अशा घोषणा देत त्यांच्या निलंबनाची मागणी केली. कथित आरोपातील ऑडीओ क्लीप्स या पुरावा असल्याने या प्रकरणाची चौकशी उच्च न्यायालयाच्या न्यायाधीशांमार्फत करण्यात यावी, अशी मागणी भाजपच्या सदस्यांनी लावून धरली. याच वेळी शिवसेना सदस्यांनी सैनिकांच्या पत्नींचा अपमान करणार्‍या प्रशांत परिचारक यांचे निलंबन कायम करा, अशी मागणी करीत वेलमध्ये धाव घेतली. भाजपकडून होणारी मुंडे यांच्या निलंबनाची तर शिवसेनेकडून परिचारकांच्या निलंबनाची मागणी यावर झालेल्या गदारोळात सभागृह तीन वेळा तहकूब झाल्यानंतर सभागृहाचे कामकाज अखेर दिवसभरासाठी स्थगित करण्यात आले.
आज सभागृहाची विशेष बैठक पार पडल्यानंतर नियमित कामकाजाला सुरूवात होताच भाजपच्या सदस्यांनी अध्यक्षांपुढील मोकळ्या जागेत धाव घेत धनंजय मुंडे हाय हायचे फलक दाखवत मुंडे यांचे निलंबन करा, अशा घोषणा सुरू केल्या. हा गोंधळ सुरू होताच विधानसभा अध्यक्ष हरिभाऊ बागडे यांनी सभागृहाचे कामकाज दहा मिनिटांसाठी तहकूब केले. त्यानंतर पुन्हा कामकाज सुरू होताच पुन्हा भाजप सदस्यांनी गोंधळ घालीत घोषणाबाजी सुरू केली. भाजपचे सदस्य अनिल गोटे यांनी बोलण्यास उभे राहत धनंजय मुंडे यांच्याविषयीची ऑडिओ क्लीप टीव्हीवर प्रसिद्ध झाल्याने ही देशाला हादरवणारी घटना आहे असे सांगितले. विधान परिषदेत लक्षवेधी उपस्थित करण्यासाठी पैसे घेतले जातात असा गंभीर आरोप या क्लीपमध्ये करण्यात आला आहे. पुराव्यासह आलेल्या ह्या क्लीपमध्ये विधीमंडळाचा सदस्य दलाली करतो असा आरोप आहे. याआधी मुंडे यांनी अभिभाषणाचा अनुवाद गुजरातीतून झाला असे खोटे आरोप केले . त्यामुळे मुंडे यांच्या ऑडीओ क्लीपची उच्च न्यायालयाच्या न्यायाधीशामार्फत चौकशी झाली पाहिजे अशी मागणी केली. ज्याप्रमाणे परिचारक यांच्या वक्तव्यानंतर त्यांचे तत्काळ निलंबन करून चौकशी करण्यात आली त्याप्रमाणे मुंडे यांचे निलंबन करून चौकशी झाली पाहिजे अशी मागणी त्यांनी केली.
यावेळी शिवसेनेचे सदस्य सुनील प्रभू यांनी हरकतीचा मुद्दा उपस्थित करीत अनिल गोटे यांनी परिचारक यांचे नाव घेतले आहे. परिचारक यांनी देशाच्या सीमेवर लढणार्‍या सैनिकांच्या पत्नींचा अवमान केला आहे. त्यांमुळे त्यांचे निलंबन करण्यात आले होते. सैनिकांचा अपमान करणार्‍या या देशद्रोहींना शिक्षा दिली पाहिजे. त्यांचे निलंबन का मागे घेतले असे सांगत त्यांचे निलंबन कायम करा, अशी मागणी केली. यावेळी भाजपचे आमदार मुंडे यांच्या निलंबनासाठी वेलमध्ये उतरले असताना शिवसेना आमदारांनी वेलमध्ये उतरत परिचारिकांचे निलंबन कायम करा अशा घोषणा दिल्या. यावेळी झालेल्या गोंधळामुळे दोनदा कामकाज तहकूब करण्यात आले.
मुंडे यांच्यावर आरोप होत असताना अजित पवार यांनी वृत्तवाहिनीवर जी बातमी दाखवली आहे त्या क्लीपमध्ये मुंडेंचे नाव नाही, कोणत्या आमदारांचे नाव नाही, कळसे यांचाही आवाज नाही. कुणाचाही आवाज या क्लीपमध्ये नसताना केवळ बदनाम करण्याचा प्रयत्न केला जात आहे, अशी बाजू मांडली. याप्रकरणी राज्याचे मुख्यमंत्री, विधानसभा अध्यक्ष, विधान परिषद सभापती, संसदीय कार्यमंत्री, विधानसभा विरोधी पक्षनेते यांनी ही क्लीप ऐकावी किंवा याप्रकरणाची न्यायालयीन चौकशी करावी अशी मागणी त्यांनी केली. मात्र त्यानंतरही गोंधळ सुरूच राहिल्याने सभागृहाचे कामकाज दिवसभरासाठी स्थगित करण्यात आले.
