सर्वसामान्यांची एसटी महागणार
मुंबई : इंधनाच्या वाढलेल्या दरामुळे सर्वसामान्यांची एसटी महागणार आहे. एसटीसमोर अपरिहार्य तिकिट दरवाढीचे चिन्ह असून, लवकरच एसटी प्रशासन तिकिट दरवाढ करण्याचा गांभीर्याने विचार करीत आहे, अशी माहिती एसटी महामंडळामार्फत देण्यात आली आहे. वाढत्या डिझेल किंमतीमुळे दिवसेंदिवस इंधन खर्चात वाढ होत असल्याने महामंडळाला तब्बल २ हजार ३०० कोटी रुपयांचा संचित तोटा झाला आहे.
गेल्या वर्षी मे २०१७ मध्ये एसटीला मिळणाऱ्या डिझेलचा दर हा सरासरी ५८.०२ रूपये इतका होता. तो यंदाच्या मे महिन्यात सरासरी ६८.3९ रूपये एवढा झाला आहे. त्यामुळे प्रति लीटर १०.३८ रूपये इतका जादा झाला आहे. वाढत्या डिझेल किंमतीमुळे दिवसेंदिवस इंधन खर्चात वाढ होत असल्याने महामंडळाला तब्बल २ हजार ३०० कोटी रुपये संचित तोटा झाला आहे. एसटीला यावर्षी केवळ इंधन दरवाढीमुळे ४६० कोटी रुपयांचा अतिरिक्त भार सहन करावा लागणार आहे.याचबरोबर इतकाच भार एसटीतील सुमारे १ लाख कर्मचाऱ्यांच्या होणाऱ्या पगारवाढीमुळे भविष्यात सहन करावा लागणार आहे. तसेच महामार्गावरील टोल दरवाढीचा अतिरिक्त भार एसटीवर पडत आहे.
गेली सहा महिने सातत्याने डिझेलच्या किंमतीमध्ये वाढ होत असून देखील केवळ ऐन गर्दीच्या हंगामात प्रवाशांना तिकीट दरवाढीची झळ बसू नये म्हणून एसटीने आतापर्यंत तिकीट दरवाढ करण्याचे टाळले आहे. यापूर्वी जुलै ते ऑगस्ट २०१४ मध्ये एसटीची तिकीट भाडेवाढ झाली होती. आता मात्र सातत्याने होणाऱ्या डिझेल दरवाढ कुठे थांबेल हे निश्चित नसल्याने एसटीला नाईलाजास्तव तिकीट भाडेवाढ करणे अपरिहार्य बनले आहे. वाढत्या डिझेलच्या किंमतीचा विचार करुन एसटी प्रशासन लवकरच आपोआप भाडेवाढीच्या सूत्रानुसार तिकीट भाडेवाढ करण्याच्या विचारात आहे, अशी माहिती एसटी महामंडळाने दिली आहे.
