निरंजन डावखरेंचा आमदारकीचा राजीनामा
भाजपात प्रवेश करणार
मुंबई : राष्ट्रवादी काँग्रेसचे आमदार निरंजन डावखरे यांनी आपल्या आमदारकीचा राजीनामा दिला आहे. त्यांनी आज विधानपरिषदेचे सभापती रामराजे नाईक निंबाळकर यांच्याकडे आपला राजीनामा सोपविला आहे.निरंजन डावखरे हे कोकण पदवीधर मतदार संघातून आमदार म्हणून निवडून आले होते. उद्या मुख्यमंत्री देवेंद्र फडणवीस यांच्या उपस्थित भाजपात प्रवेश करणार आहेत.
राष्ट्रवादीचे दिवंगत नेते वसंतराव डावखरे यांचे पुत्र निरंजन डावखरे हे सध्या कोकण पदवीधर मतदार संघातून राष्ट्रवादीचे आमदार होते. विधानपरिषदेचे सदस्य निरंजन डावखरे यांची मुदत पुढच्या महिन्यात संपत आहे. पदवीधर आणि शिक्षक मतदारसंघाच्या निवडणूका पुढच्या महिन्यात होणार आहेत. या पार्श्वभूमीवर डावखरे यांना भाजपात प्रवेश देवून भाजपने राष्ट्रवादीला मोठा धक्का दिला आहे. डावखरे उद्या मुख्यमंत्री फडणवीस यांच्या उपस्थितीत भाजपात प्रवेश करणार आहेत. ठाण्यातील स्थानिक नेत्यांकडून कोंडी केली जात असल्याने त्यांनी हा निर्णय घेतल्या सांगितले. त्यांनी राष्ट्रवादीच्या सदस्यत्वाचा राजीनामा पक्षाकडे सोपविला आहे. भाजपकडून डावखरे यांनी कोकण पदवीधर मतदार संघातून उमेदवारी देण्यात येणार आहे.
