भाजप म्हणजे ना’ताळ’ ना ‘मेळ’ फक्त जुमल्यांचा खेळ
मुंबई: व्यंगचित्रातून प्रतिस्पर्धी पक्षावर टीका करण्याचा प्रयोग आता राष्ट्रवादीनेही सुरू केला असून भाजपवर खोचक टीका केली आहे. भाजप म्हणजे ना’ताळ’ना ‘मेळ’ फक्त जुमल्यांचा खेळ अशी बोचरी टीका केली असून ट्विटर हॅंडलवरून हे व्यंगचित्र पोस्ट केले आहे.
व्यंगचित्रात मुख्यमंत्री देवेंद्र फडणवीस यांना जलयुक्त शिवाराची कामे पूर्ण झाल्याचे सांगताना दाखवण्यात आले असून त्यांच्याच मागे नितीन गडकरी हिजड्चांना मुले होतील परंतु जलसंधारणाची कामे पूर्ण होणार नाहीत, असे म्हणताना दाखवले आहेत. दुसऱ्या बाजूला पंतप्रधान मोदी आणि अमित शहा चर्चा करत असून गडकरींच्याच तेंडात बोळा कोंबावा लागेल, असे सांगताना दिसत आहेत. भाजपमधील अंतर्गत कारभाराची जोरदार खिल्ली उडवली आहे.भाजपच्या नेत्यांकडून गेल्या काही दिवसांपासून हनुमानाची जात असो की जलसंधारणाची कामे असोत, वादग्रस्त वक्तव्ये केली जात आहेत. त्यांचा समाचार व्यंगचित्रातून घेतला आहे.
राष्ट्रवादीने भाजपवर जोरदार टीका करणारे ट्विट केले असून आश्वासनांची गाजरे दाखवणाऱ्या सरकारला आपल्याच नेत्यांच्या वक्तव्यांचा ताळमेळ राहिला नाही, असे म्हटले आहे.आता तर आपल्या मंत्रिमंडळातील वाचाळवीर मंत्र्यांच्या तोंडात बोळा कोंबण्याची कसरत करावी लागेल, असे राष्ट्रवादीने म्हटले आहे. आता भाजप कसे उत्तर देतो, याची उत्सुकता आहे.
