मुंबई नगरी टीम
मुंबई । केंद्रातील नरेंद्र मोदी सरकार पेट्रोल डिझेलवर भरमसाठ कर लादून जनतेचे खिसे कापत आहे.या अन्यायी जुलमी,अत्याचारी दरवाढीविरोधात काँग्रेस पक्षाने रस्त्यावर उतरून आज राज्यभर आंदोलनाच्या माध्यमातून विरोध केला आहे.मोदी सरकारने ही जुलमी करवसुली कमी करून जनतेला दिलासा द्यावा अन्यथा भविष्यात काँग्रेस पक्ष यापेक्षा तीव्र आंदोलन करेल,असा इशारा काँग्रेसचे प्रदेशाध्यक्ष नाना पटोले यांनी दिला आहे.
काँग्रेस प्रदेशाध्यक्ष नाना पटोले आणि मदत व पुनर्वसन मंत्री विजय वडेट्टीवार यांनी गडचिरोली जिल्ह्यातील वडसा येथील पेट्रोल पंपावर इंधन आणि गॅस दरवाढी विरोधातील आंदोलनात सहभाग घेतला.वडसा येथे प्रसारमाध्यमाशी बोलताना नाना पटोले म्हणाले की,कोरोनाने दीड वर्षापासून लोकांचे उत्पन्न कमी झाले आहे,उद्योग धंदे बंद आहेत, लाखो लोकांचे रोजगार गेले, कठीण परिस्थितीत लोक जगत असताना त्यात इंधन दरवाढ व महागाईने लोकांचे जगणे मुश्कील झाले आहे. युपीए सरकारच्या काळात डॉ. मनमोहनसिंह यांनी इंधनाच्या महागाईची झळ लोकांना बसू नये म्हणून दर स्थिर ठेवून जनतेला दिलासा होता परंतु मोदी सरकार मात्र आंतरराष्ट्रीय बाजारात कच्चे तेलाचे भाव कमी असतानाही भरमसाठ कररुपाने लोकांच्या खिशावर दरोडे टाकून नफेखोरी करत आहे.
राज्यव्यापी आंदोलनात ठाणे येथे प्रदेश कार्याध्यक्ष नसीम खान यांच्या नेतृत्वाखाली आंदोलन करण्यात आले.कोल्हापुरात गृहराज्यमंत्री सतेज पाटील यांच्या नेतृत्वाखाली आंदोलन करण्यात आले.पुण्यातील सर्व विधानसभा मतदार संघांमधील ३५ पेट्रोल पंपासमोर काँग्रेस कार्यकर्त्यांनी निदर्शने केली.कसबा विधानसभा मतदारसंघातील कुलकर्णी पेट्रोल पंपासमोर प्रदेश काँग्रेसचे उपाध्यक्ष आणि माजी आमदार मोहन जोशी यांच्या नेतृत्वाखाली निदर्शने करण्यात आली. चंद्रपुरात खासदार बाळू धानोरकर यांच्या नेतृत्वाखाली आंदोलन करण्यात आले.नाशिक,सांगली,अहमदनगर,नांदेड,मालवण,अमरावती,सावंतवाडी,कणकवली, बुलढाणा,नांदेड,औरंगाबाद यासह विविध ठिकाणी आंदोलन करण्यात आले.राज्यातील एक हजार पेट्रोल पंपांवर काँग्रेस कार्यकर्त्यांनी एकाचवेळी आंदोलन करुन इंधन दरवाढीचा तीव्र निषेध केला.यावेळी मोदी सरकार जुलमी दरवाढीविरोधात घोषणाबाजी करण्यात आली.
