शिवाजी पार्कच्या बाभळीला “बारामतीची बोरे”
मुंबई नगरी टीम
मुंबईःराज ठाकरे आणि भाजप यांच्यात आता जोरदार वाक्युद्ध पेटले आहे. भाजपचे मुंबई अध्यक्ष आशिष शेलार यांनी मनसे प्रमुख राज ठाकरे यांचे नाव न घेता टोला लगावला आहे. शिवाजी पार्कच्या बाभळीला बारामतीची बोरे, अशा शब्दांत शेलार यांनी ट्विटरवरुन राज ठाकरेंवर शरसंधान केले आहे.
मुख्यमंत्री देवेंद्र फडणवीस यांनी राज ठाकरेंवर बारामतीचा पोपट म्हणून टीका केली होती. त्यानंतर राज ठाकरेंनीही फडणवीसांवर पलटवार केला होता. त्यानंतर हे बारामतीचा पोपट प्रकरण.सोशल मीडियावर सुरु झाले आहे. मनसेला रामराम ठोकलेले एकमेव आमदार शरद सोनावणेंवरुनही शेलारांनी टोला हाणला आहे.
‘सोडून गेले नगरसेवक…सोडून गेले आमदार…एकटे एकटे वाटले म्हणून स्‍वतःच्‍या काकांना नाही..जाणत्‍या राजाला गाठले..पाठीवर हात ठेऊन..नव्या भाषणाची स्क्रिप्‍ट हातात देऊन.. बारामतीच्‍या काकांनी “फक्त लढ” असे म्‍हटले.!! शिवाजी पार्कच्या बाभळीला बारामतीची बोरे,असे काव्यमय ट्वीट आशिष शेलार यांनी केले आहे.
राज ठाकरे आणि राष्ट्रवादी अध्यक्ष शरद पवार यांच्यामध्ये जवळीक वाढल्याने चर्चा सुरू झाली होती. राज ठाकरे यांच्या मनसेला आघाडीत घेण्यासाठी पवारांनी भरपूर प्रयत्न केले. पण काँग्रेसने राज यांच्यासाठी दरवाजे बंद करून घेतल्याने राज आणि पवार यांचा नाईलाज झाला. त्यानंतर राज यांनी निवडणूक लढवणार नसल्याचे जाहीर केले.मात्र आपण भाजपविरोधात प्रचार करणार असल्याचे त्यांनी स्पष्ट केले होते. त्यांनी अलिकडे काही भाषणांत फक्त पंतप्रधान मोदी यांना लक्ष्य केले आहे. त्यामुळे भाजप त्यांच्यावर प्रचंड संतप्त आहेत. आता शेलार यांच्या टीकेला राज ठाकरे उत्तर देतात का,याची उत्सुकता आहे.
