दक्षिण मध्य मुंबईत काँग्रेसचा पदयात्रांवर भर
मुंबई नगरी टीम
मुंबई : लोकसभा निवडणुकीचा प्रचार ऐन भरात आलेला असतानाच आता दक्षिण मध्य मुंबईचे काँग्रेसचे उमेदवार एकनाथ गायकवाड यांनी मतदारांशी थेट संपर्कावर भर देण्याचे नियोजन केले आहे. रविवारी सुट्टीच्या दिवशी त्यांनी संपुर्ण दिवस मतदारसंघातील विविध भागात पदयात्रा काढून मतदारांशी थेट संवाद साधला.
केंद्र आणि राज्यातील भाजपच्या नेतृत्वाखालील सरकारने विकासाच्या नावाखाली केलेला बट्ट्याबोळ मतदारांपर्यंत पोहचवतानाच काँग्रेसच्या जाहिरनाम्यात दिलेली वचने आणि त्याच्या अंमलबजावणीचा आराखडा याबाबतची संक्षिप्त माहिती या पदयात्रांद्वारे मतदारांपर्यंत पोहोचवण्याचे नियोजन काँग्रेसने केले आहे. सत्ताधारी खोट्या प्रचाराच्या माध्यमातून न झालेल्या विकासाचे दावे करत आहेत. या दाव्यांमधील फोलपणा मतदारांना दाखवून त्यामागील तथ्य सांगण्याचा प्रयत्न या थेट संपर्क अभियानाद्वारे करण्यात आले. रविवारी एकनाथ गायकवाड यांनी काँग्रेसचे पदाधिकारी आणि कार्यकर्त्यांसह सायन चर्चला भेट देऊन उपस्थितांशी संवाद साधला. त्यानंतर धारावी परिसरातील नाईक नगर येथे पदयात्रेद्वारे नागरिकांच्या भेटीगाठी घेतल्या. अकराच्या सुमारास चेंबूर कॅम्प परिसरातील रामटेकडी गार्डन येथे अल्पसंख्याक समाजासोबत संवाद साधण्यासाठी एका बैठकीचे आयोजन करण्यात आले होते. अॅन्टॉप हिल परिसरातील विजय नगर येथील प्रियदर्शनी शाळेच्यापरिसरात पदयात्रेच्या माध्यमातून नागरिकांशी त्यांनी संवाद साधला.सायंकाळी वडाळा येथील सॉल्ट पॅन रोड परिसरातील शिवशंकर नगरातील साईभंडाऱ्यालाही त्यांनी उपस्थिती लावली.
दरम्यान दक्षिण मध्य मुंबई मतदारसंघातील काँग्रेसचे उमेदवार एकनाथराव गायकवाड हे आज सोमवारी दुपारी दोनच्या सुमारास मुंबई शहर जिल्हाधिकारी कार्यालयात आपला उमेदवारी अर्ज दाखल करणार आहेत.माजी मंत्री चंद्रकांत हांडोरे, राष्ट्रवादी काँग्रेसचे नेते नवाब मलिक, काँग्रेसच्या आमदार वर्षा गायकवाड, काँग्रेसचे जिल्हाध्यक्ष हुकूमराज मेहता आदी मान्यवरांसह हजारो कार्यकर्ते यावेळी उपस्थित असणार आहेत.
