मेष – कामे पार पाडाल
या सप्ताहात दुप्पट ऊर्जेने आपण कामाला लागाल व आपली उरलेली कामे पूर्ण करण्याचा प्रयत्न कराल. योजना आखताना स्वत:च्या क्षमतांचा विचार करा. इतरांवर विसंबून योजना बनवू नका. खेळाडू, बँक कर्मचारी व धार्मिक संस्थेत काम करणाऱ्यांना चांगला मोबदला मिळेल. वसुलीचे प्रयत्न सफल होतील. प्रकृतीची पथ्ये पाळा व तब्येत सांभाळा. राजकीय क्षेत्रात प्रगती कराल. रविचे लवकरच भ्रमण आपणास फायदेशीर ठरेल. आर्थिक व्यवहारात सावधानता बाळगा. वैवाहिक जोडीदाराची अपेक्षित मदत मिळेल.
वृषभ – अडचणींतून मार्ग काढा
या आठवड्यात आपणास अनेक अडचणींतून, लोकापवादातून बाहेर पडावे लागणार आहे. हितशत्रूंचा ससेमिरा राहील, त्यातून हुशारीने मार्ग काढून पुढे जाण्याचा प्रयत्न करावा लागणार आहे. आपला योग्य दृष्टिकोन ठेवून हुशारीने वागणे हितकारक ठरणार आहे. वादविवादापासून बाजूला राहा. प्रकृतीकडे दुर्लक्ष करू नका, वेळीच औषधोपचार घ्यावीत. प्रवास करण्याचे योग येतील. आर्थिक बाजू सांभाळा. सरकारी कामांना प्राधान्य द्या. या आठवड्यात नात्यांबाबत तुम्हाला नवा अनुभव येण्याची शक्यता आहे. वैवाहिक जोडीदाराची अपेक्षित साथ मिळेल.
मिथुन – हुशारीने वागा
या सप्ताहात काहीशी द्विधा अवस्थेसारखी परिस्थिती निर्माण होण्याची शक्यता असल्याने आपण आपल्या ज्ञानाचा, अनुभवांचा हुशारीने व दूरदृष्टीने विचार करून वागणे हितकारक ठरू शकते. प्रत्येक गोष्टीत आपल्याला दुसऱ्याच्या मदतीची आवश्यकता राहणार असली तरी स्वयंसिद्ध होण्याचा प्रयत्न करा. राजकारण, क्रीडा, शेती अशा क्षेत्रांत प्रगती करण्याची संधी प्राप्त होईल. अचानक प्रवासाचे योग संभवतात. आर्थिक बाबतीत दुसऱ्यांची मदतीची अपेक्षा राहील. वैवाहिक जोडीदाराची अपेक्षित साथ मिळेल. प्रकृतीमान ठीक राहील.
कर्क – एकतर्फी विचार नको
या सप्ताहात एकतर्फी विचार केल्याने अनेक अडचणींना आपणास सामोरे जावे लागणार आहे. आपल्याकडून कोणतीही चूक होणार नाही याची खबरदारी घ्यावी. आर्थिक व्यवहारात ज्येष्ठांचा, तज्ञांचा सल्ला घेणे हितकारक ठरेल. नोकरदारांना काहीसा दिलासा मिळेल. प्रवासाचे बेत साध्य होतील. कलागुणांना प्रोत्साहन मिळेल. सरकारी नियम कटाक्षाने पाळा. कौटुंबिक वातावरण वादासारख्या गोष्टींनी बिघडणार नाहीत याची दक्षता घ्या. नात्यांबाबत भावूकपणा ठेवू नका. जोडीदाराची उत्तम साथ मिळेल.
सिंह – घाईगडबड टाळा, सावधपणे वागा
या आठवड्यात घाई-गडबड करण्याऐवजी हुशारीने व सावधपणे काम करणे योग्य ठरेल. खाद्यपदार्थाच्या व्यवसायात बऱ्यापैकी लाभ मिळू शकतो. प्रगतीकडे वाटचाल करण्यासाठी आपण प्रयत्नशील राहा. कुटुंबियासमवेत आनंदात क्षण घालवाल. नातलगांच्या गाठीभेटीचे योग येतील. इतरांच्या अपेक्षा आपल्याकडून पूर्ण होऊ शकतील. आपली प्रकृती ठीक असली तरी सांधेदुखीची शक्यता आहे, तेव्हा जपा. वैवाहिक जोडीदाराची उत्तम साथ मिळू शकेल.
कन्या – हट्टीपणाला आवर घाला
आपले ग्रहमान पाहता या सप्ताहात आपल्या हट्टाला लगाम घालण्याची व बोलण्यावर नियंत्रण ठेवण्याची आवश्यकता राहील, पर्यायाने वरिष्ठांची नाराजी पत्करावी लागू शकेल. दूरच्या प्रवासाचे योग कुटुंबियासमवेत संभवतात. कलाक्षेत्राला चांगले प्रोत्साहन मिळेल. वाहन चालवताना सावधानता बाळगा. घरगुती प्रश्नांकडे अधिक लक्ष देणे गरजेचे आहे. मुलांचे अपेक्षित सहकार्य व ज्येष्ठांचे मार्गदर्शन मोलाचे ठरेल. प्रकृतीमान ठीक राहील. वैवाहिक जोडीदाराची उत्तम साथ मिळेल.
तूळ – ध्येय गाठू शकाल
आपले ग्रहमान आपणास साथ देणारे आहे त्यामुळे आपण आपले ध्येय गाठू शकाल व आपले उद्दिष्ट साध्य करता येईल. कला, साहित्य, शिक्षण अशा क्षेत्रांत आपली प्रगती साधता येईल. नोकरी-व्यवसायात पुढे जाण्याची संधी मिळू शकेल. आपल्या नव्या कल्पनांना उत्तम जोड मिळू शकेल. तुमचा मार्ग एकदम मोकळा आहे, त्यामुळे आपण बिनदिक्कत पुढे जाऊ शकाल. नात्याबाबत सकारात्मक विचार तुमच्यात चांगला बदल घडवून आणीन. आपले प्रकृतीमान ठीक असले तरी मोसमी समस्या उद्भवण्याची शक्यता आहे. वैवाहिक व कौटुंबिक जीवन आनंदात घालवाल.
वृश्चिक – पथ्ये पाळा, पुढे चला
या सप्ताहात काही पथ्ये पाळल्यास आपण पुष्कळ गोष्टी साध्य करू शकाल. आपण भावनेसोबत बुद्धीने काम करण्याचे धोरण अंगिकारावे. तुम्हाला आपले महत्त्व वाढविण्याची गरज आहे. यासाठी मौजमस्तीतून बाहेर पडून आपल्या कामावर फोकस करा. भावी काळासाठी नव्या योजनांचा विचार करा. खर्चावर योग्य नियंत्रण ठेवून अनावश्यक खर्च कटाक्षाने टाळा. जेव्हा शक्य असेल तेव्हा मित्रमंडळींची मदत घ्या. आर्थिक बाजू ठीक राहील. प्रवासात सावधानता बाळगा. प्रकृतीमान ठीक राहील पण खाण्यापिण्याची पथ्ये पाळा. वैवाहिक जोडीदाराला सामंजस्याने वागणे इष्ट राहील.
धनू – कामात व्यस्त राहाल
आपले ग्रहमान पाहता या सप्ताहात आपण कामकाजात व्यस्त राहणार असून आपली धावपळही वाढणार आहे. एकूण परिस्थिती अनुकूल असल्याने नोकरी-व्यवसायात आपले कर्तृत्व दाखविण्याची संधी प्राप्त होईल. नव्या ओळखींचा लाभ घेता येईल. वरिष्ठांकडून आपल्या कामाचे कौतुक करण्यात येईल. नात्याबाबत आपले विचार व्यापक आहेत, पर्यायाने काही मंडळींना न आवडण्याची शक्यता राहील. प्रकृतीमान ठीक असले तरी मोसमी समस्यांपासून सावधानता बाळगा. वैवाहिक जोडीदाराची उत्तम साथ मिळेल.
मकर – सावधगिरी बाळगा
साडेसातीचं पर्व, त्यात व्ययस्थानी ग्रहांची मांदियाळी अशा परिस्थितीत आपण सर्व बाबतीत सावधगिरी बाळगणे आवश्यक आहे. नोकरदारांनी वरिष्ठांशी वादविवाद न करता मिळते-जुळते घेण्याचे धोरण ठेवावे. कायदा व नियमांचे कटाक्षाने पालन करावे. धार्मिक कार्यात सहभागी व्हाल. आर्थिक बाजू ठीक असली तरी अनावश्यक खर्च टाळा. प्रवासाचे योग येतील. कलागुणांना प्रोत्साहन मिळेल. व्यापाराला चालना मिळेल. गोड बोलून पुष्कळ गोष्टी साध्य करता येतील. एकूण परिस्थिती पाहून वागणे हितकारक राहील. वैवाहिक जोडीदाराची साथ मिळू शकेल.
कुंभ – आशा-आकांक्षा उंचावतील
ग्रहमान आपणास साथ देणारे असल्याने या सप्ताहात आपल्या आशा-आकांक्षा यांची पूर्तता करू शकाल. नको त्या प्रलोभनांपासून दूर राहा. व्यापार-उद्योगाला उत्तम चालना मिळेल. काही महत्त्वाचे निर्णय आपणास घ्यावे लागतील. नोकरी-व्यवसायात चांगला प्रतिसाद मिळू लागेल. आपल्या कामाची वरिष्ठांकडून वाहवा ऐकण्यास मिळेल. राजकीय क्षेत्रात आपणास वजन वाढल्याचे संकेत मिळतील. आपल्या आवडीच्या कामात अधिक रमाल. आपल्याला केलेल्या कार्याची पावती मिळू शकेल. प्रकृतीबाबत श्वसनाच्या विकाराकडे अधिक लक्ष द्यावे. पथ्ये पाळावीत. वैवाहिक जोडीदाराकडून अपेक्षित सहकार्य मिळेल.
मीन – यशाची वाटचाल कराल
आपले ग्रहमान व नशिबाची साथ या दोन्ही गोष्टी लाभल्याने आपण यशाची वाटचाल करू शकाल. नोकरी-व्यवसायात आपल्या कौशल्याने सर्व मंडळी प्रभावित होतील. आर्थिक बाजू सावरता येईल. व्यापारात प्रगतीची पाऊले टाकता येतील. नोकरीतील काही भाग्यवंतांना आपल्या मनाप्रमाणे बदली मिळण्याची शक्यता राहील. घरासंबंधीचे प्रश्न सुटू लागतील. सामाजिक कार्यात आपली वाहवा संभवते. मुलांकडून एखादी शुभवार्ता ऐकण्यास मिळेल. प्रवासाचे स्वप्न पुरे करता येईल. धार्मिक कार्याचा आनंद मिळेल. प्रकृतीमान ठीक राहील. जोडीदाराची उत्तम साथ मिळेल.
