शेतकरी आणि सामान्यांच्या तोंडाला पाने पुसणारा अर्थसंकल्प
मुंबई नगरी टीम
मुंबई : मोदी सरकारचा अर्थसंकल्प म्हणजे पैसे गोळा करून कार्पोरेट जगतासाठी रेड कार्पेट टाकणारा आणि देशाचा पोशिंदा असलेला शेतकरी, शेतमजूर, कष्टकऱ्यांच्या तोंडाला पाने पुसणारा हा अर्थसंपकल्प आहे, अशी तिखट प्रतिक्रिया विधानसभा विरोधी पक्षनेते विजय वडेट्टीवार यांनी एका प्रसिध्दी पत्रकाद्वारे व्यक्त केली आहे.सामान्य जनतेकडून आतापर्यंत ६ लाख कोटी रूपयांचा टॅक्स गोळा केला जात होता. मात्र या अर्थसंकल्पाने आता तब्बल ११ लाख कोटी रूपये टॅक्सच्या रूपाने सामान्य जनतेकडून वसूल केले जाणार आहेत. म्हणजे सामान्य जनतेला महागाईच्या खाईत लोटणारा, देशात सर्वाधिक आत्महत्या होत असताना शेतकऱ्यांना दुर्लक्षित करणारा, बेरोजगारांना वाऱ्यावर सोडणारा हा मोदी सरकारचा अर्थसंकल्प आहे असेही वडेट्टीवार यांनी नमूद केले.
टॅक्स वाढवून सामान्यांची लूट, महागाई वाढवून गरिबांचे कमरडे मोडणारा, शेतकऱ्यांसाठी कुठेही भरीव तरतूद नसलेला, बेरोजगारी दूर करण्यासाठी कोणतीही तरतूद नसणारा अर्थसंकल्प आहे. त्यामुळे भारतातील जनतेच्या तोंडाला पाने पुसणारा हा अर्थसंकल्प आहे असेच म्हणावे लागेलअसेही वडेट्टीवार म्हणाले.
देशात मोठ्याप्रमाणात शेतकरी आत्महत्या करीत आहे. मागच्या पाच वर्षांत देशातील शेतकरी संकटात आहे. त्यांचा विचार करून तरी मोदी सरकारने या अर्थसंकल्पात शेतकऱ्यांसाठी भरीव तरतूद असेल असे वाटले होते मात्र शेतकऱ्यांची घोर निराशा या अर्थसंकल्पाने केली आहे. मागच्या पाच वर्षांत तरूणांच्या हातात निराशाच पडली, देशात बेरोजगारांची संख्या प्रचंड वाढली अशावेळी तरी तरूणांना न्याय मिळेल असे वाटले होते. मात्र तरूणांच्या हाताला काम देण्याची कोणतीही तरतूद या अर्थसंकल्पात नाही, त्यामुळे भारतीय जनतेच्या पदरी निराशा पडली आहे, असेही वडेट्टीवार यांनी म्हटले आहे.
