ज्यांनी ज्यांनी पक्ष बदलला त्यांना जनतेने धडा शिकवलाय : जयंत पाटील
मुंबई नगरी टीम
मुंबई : आगामी विधानसभा निवडणुकीच्या तोंडावर राष्ट्रवादीला मोठी गळती लागली असतानाच राष्ट्रवादीचे प्रदेशाध्यक्ष जयंत पाटील यांनी अशा नेत्यांना टोला लगावला आहे. जेव्हा जेव्हा नेत्यांनी अशा प्रकारे पक्ष बदलला आहे तेव्हा तिथल्या जनतेने त्या नेत्यांना धडा शिकवला आहे अशी जाणीव त्यांनी पक्ष सोडणा-यांना करून देत भाजप राष्ट्रवादी काँग्रेसच्या नेत्यांच्या मागे लागली आहे असा थेट आरोप त्यांनी केला आहे.
राष्ट्रवादीचे नेते खेचण्यासाठी सर्व मार्गाने प्रयत्न केले जात आहेत. सरकारी यंत्रणांची मदत घेतली जात आहे असा आरोप करतानाच भाजपने दुसरा पक्ष फोडण्यापेक्षा काम केले असते तर जनतेचा आशिर्वाद मिळाला असता असा टोला राष्ट्रवादीचे प्रदेशाध्यक्ष जयंत पाटील यांनी भाजपला लगावला आहे.मनसेचे अध्यक्ष राज ठाकरे यांनी आज जयंत पाटील यांची भेट घेतली. राज ठाकरे भेटीत काय ठरले हे लवकरच जाहीर केले जाईल असेही त्यांनी सांगितले. या बैठकीला विधीमंडळ पक्षनेते अजित पवार,शेकापचे नेते आमदार जयंत पाटील, स्वाभिमानी शेतकरी संघटनेचे नेते माजी खासदार राजू शेट्टी उपस्थित होते असे त्यांनी स्पष्ट केले.इतर पक्ष अशाप्रकारे फोडला जात आहे हे भाजपचे कमकुवतपणाचे उदाहरण आहे असेही पाटील म्हणाले.अनेक नेते भाजपमध्ये जाण्याच्या मार्गावर आहे. जेव्हा जेव्हा नेत्यांनी अशा प्रकारे पक्ष बदलला आहे तेव्हा तिथल्या जनतेने त्या नेत्यांना धडा शिकवला आहे याची जाणीव त्यांनी अशा नेत्यांना करुन दिली.
