मुंबई नगरी टीम
मुंबई : निसर्ग चक्रीवादळामुळे रायगड,रत्नागिरी व सिंधुदुर्ग जिल्ह्यात झालेल्या नुकसानीच्या पार्श्वभूमीवर रायगडचे खासदार सुनिल तटकरे यांनी मुख्यमंत्री उद्धव ठाकरे,उपमुख्यमंत्री अजित पवार व राष्ट्रवादी काँग्रेसचे अध्यक्ष खासदार शरद पवार यांना निवेदन देवून कोकणासाठी ‘विशेष आर्थिक पॅकेज’ देण्याची मागणी केली आहे.
या चक्रीवादळाने घरे, फळबागा, पिके, मत्स्यव्यवसायिकांच्या बोटी, वाहने, गणेशमूर्तीकार, विद्युत तारा, छोटे-मोठे व्यापारी, टपरीधारक व इतर मालमत्तेचे मोठ्या प्रमाणात नुकसान झालेले आहे.या चक्रीवादळाने रायगड जिल्ह्यातील मुरूड येथे लॅण्डफॉल केलेले असल्याने जिल्ह्यातील सर्व तालुके व वादळाच्या परिघातील रत्नागिरी व सिंधुदुर्ग जिल्ह्यातही घराचे पत्रे उडून अन्नधान्याचे तसेच घरगुती वस्तूंचे मोठे नुकसान झाले आहे. प्राथमिक माहितीनुसार अंदाजे ५ हजार कोटींचे नुकसान झाले आहे. तरी नुकसानग्रस्तांना भरपाई देण्यासाठी शासनाने विशेष सर्वेक्षण करून ‘विशेष आर्थिक पॅकेज’ तातडीने जाहीर करावी अशी विनंती या निवेदनात खासदार तटकरे यांनी केली आहे.
